LO BARBARÓS

Èra per un polit mes de Mai. Assetat peresosament a l’ombra del meu agast, plan ocupat de far pas res, agachavi volar las moscas. La me passavi bèla, tot a l’entorn èra suau e butava a la langor.
Mas aquí qu’aquela tranquillitat es trebolada per un bruch leugièr al dessus del cap, lèvi los uèlhs, e vesi se pausar sus una brancòta una pichona bola emplumada amb un bèc fin e un pitral rogenc que se bota a canturlejar bravament.
– È tu, lo barbarós ! sabi ben que cantes polidament,, mas pel moment, me fariás plaser d’anar far tos triolets endacòm mai.
El, se cala, clina son capisson sul costat, me finta, tant val dire de naut…e torna prene sa cançoneta coma se res non èra.
Aquò passa la rega ! Me lèvi, bracegi :- Fai-te enlai secafetge ! Còp sec l’aucelon pren la volada…e ieu retròbi ma cauma.
Al cap d’un moment, aquí qu’ausissi alatejar mon barbarós que torna s’ajocar sus la brancòta. Qué far ? aprèp tot, me geinava pas tant qu’aquò.
– Sès pas pauruc mon pichonet, òc ben ! se t’agrada, pòdes per ara demorar aquí e me téner companhiá . Sabi pas se a comprés, mas ai agut drech a un vertadièr concèrt, benlèu que me voliá mercejar ?
Aital, los jorns venents, cada còp que sortissiái dins lo jardin, lo barbarós tanlèu me veniá veire, voletejava a l’entorn, puèi se pausava e bresilhava joiosament. Quand per cas, èra pas aquí, aquò’s ieu que l’apelavi : tsui,tsui, tsui, tiwi, tiwi, vèni aquí. Deviá pas nisar plan luènh que l’esperavi pas plan temps, d’aitant mai que m’èri acostumat de l’apitançar un pauquet cada jorn. Li esbocinavi pelsòl de trocets de pan o de bescuèch que veniá picorejar goludament. Crentós dins d’abòrd, pichon a pichon s’aprochava, a mesura qu’espandissiái las micas près de ieu.
Me calguèt almens un mes de paciéncia per, acocolit doçamenton sus l’èrba, capitar fin finala de lo far venir picorejar dins la man.
Vos pòdi dire que n’èri pro fièr !
Aquel acòrdi coral durèt qualques temps, èrem fòrt plan totes dos.
Puèi, un jorn, a desaparegut. Per tant qu’apelèsse, aviá desaparegut per de bon. Me pensi que, malurosament, a fach lo delici d’un marrit catàs del ròdol.
Paure barbarós, ai pas plorat, mas quand m’assèti jol meu arbre, se soi tranquil…çaquelà m’es de manca mon amic pichonet.

A.Tastaire

TRADUCTION :

LE ROUGE-GORGE

C’était un joli mois de Mai. Assis paresseusement à l’ombre de mon érable, très occupé à ne rien faire, je regardais voler les mouches. Je me la coulais douce, tout aux alentours était calme et incitait à la langueur .
Mais voilà que cette tranquillité est troublée par un léger bruit au dessus de ma tête, je lève les yeux et je vois se poser sur une branchette une petite boule emplumée avec un bec fin et un poitrail rougeâtre qui se met à chantonner bon train.
– Eh toi le rouge-gorge ! je sais bien que tu chantes joliment, mais pour le moment, tu me ferais plaisir d’aller faire tes trilles ailleurs .
Lui, il se taît, penche sa petite tête sur le côté, me regarde, autant dire de haut…et reprend sa chansonnette comme si de rien n’était.
Cela passe les bornes, je me lève, je gesticule, - Tire toi de là, importun ! vivement, l’oisillon s’envole…et moi je retrouve mon repos à l’ombre.
Un moment après, voilà que j’entends battre des ailes mon rouge-gorge qui revient se percher sur la branchette. Que faire ? après tout il ne me gênait pas tant que ça.
– Tu n’es pas peureux mon tout petit, oui certes ! si cela te plaît, tu peux rester là pour le moment et me tenir compagnie.
Je ne sais pas s’il a compris, mais j’ai eu droit à un véritable concert, peut être voulait-il me remercier ?
Ainsi, les jours suivants, chaque fois que je sortais dans le jardin, le rouge-gorge venait me voir aussitôt, il voletait tout autour, ensuite il se posait et gazouillait joyeusement. Quand par hasard il n’était pas là, c’est moi qui l’appelais – tsui, tsui, tsui, tiwi, tiwi, viens là ! Il ne devait pas nicher trop loin, car je ne l’attendais pas longtemps, d’autant plus que j’avais pris l’habitude de le nourrir un petit peu chaque jour. Je lui émiettais par terre des petits morceaux de pain ou de biscuit qu’il venait picorer goulûment. Craintif au début, petit à petit il s’approchait au fur et à mesure que je répandais les miettes plus près de moi.
Il me fallut au moins un mois de patience pour, accroupi tout doucement sur l’herbe, réussir enfin à le faire venir picorer dans la main.
Je peux vous dire que j’en étais assez fier !
Cette entente cordiale dura quelque temps, nous étions au mieux tous les deux. Puis un jour, il a disparu. J’avais beau l’appeler, il avait bel et bien disparu.
Je pense que, malheureusement, il a fait le régal d’un vilain gros chat des environs.
Pauvre rouge-gorge, je n’ai pas pleuré, mais quand je m’assieds sous mon arbre, si je suis bien tranquille…malgré tout il me manque mon tout petit ami.

A.Tastaire ( Juin 2004 )