Texte, enregistraments et transcripcion per Joan Pascal Godonesca

Racontes reculhís al près d’ Anthony Ginibre, 1999.

Anthony Ginibre nasquèt a Sant-Jan-Lespinassa, pròche Sant-Seren dins lo Carcin, departament d’Òlt lo vint-e-quatre d’agost 1908. Foguèt paisan tota sa vida dins aquela comuna, a seissanta kilomètres d’Orlhac coma de Briva e un pauc mai de Cáurs. Visquèt dins aquèla val onte raja lo flume Dordonha en trabalhar la tèrra e en parlar cada jorn « patoès » coma disiá. Venguèt vièlh, foguèt malaude, e acabèt sa vida pauc de temps i a, al pè de sa filha a Clarmont.
Los tèxtes que seguísson son estats enregistrats al manhetofòne e transcrich segon la grafia dicha classica per Joan Pascal Godonesca, son pichon-filh.

Mamà a l’escòla

I a quauques jorns d’aquò. Quand anava a Sent-Seren ta maire i anava pas de pè, mès a Sent-Jan i anava de pè. Èra pas tota sola : i aviá la de chas S*, i aviá la de chas M*. Li cromperiam un soleix. Anava am lo soleix o am la biciclèta. Trabalhava pas mal per çò que ajèt les diplòmes qu’èra pas bien vièlha. A detz-e-nau-v-ans èra institutriça, mai pensi plus lèu. Les prumièrs temps foguèt nommada andé far ‘na periòda au Moliniat ; i demorèt sai pas... quauques jorns, i demorèt pas bien temps.

Après anguèt a Sent-Chèl. A Sent-Chèl i anava que per remplaçament, solament i demorèt tres ans ! Aviá pro de dròlles, n’aviá ‘na bona daissa de dròlles que per debutar ‘quò èra un pauc... mès enfin qu’èra aital. Après de Sent-Chèl anguèt a Pont-Verní, al pè de Sosceirac. Amont i demorèt un an. Al Toire , èra bien, èra pas lònh, rentrava cada ser. Après se maridèt e venguèt aicí.